រាជធានីភ្នំពេញ៖នាព្រឹកថ្ងៃទី២០ ខែកុម្ភៈ ឆ្នាំ២០១៩នេះ នៅអគ្គស្នងការដ្ឋាននគរបាលជាតិ បានបើក កិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក របស់អនុគណៈកម្មការទី២ (គ.ស.ច.គ) ប្រចាំខែមករា ឆ្នាំ២០១៩នេះ ក្រោមអធិបតីភាពនាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ និងជាអនុប្រធានចិន្រ្តៃយ៍ នៃអនុគណៈកម្មការទី២ (គ.ស.ច.គ) តំណាងនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិនិងជាប្រធាននៃអនុគណៈកម្មការទី២ (គ.ស.ច.គ)។
នៅក្នុងឱកាសនោះដែរនាយឧត្តមសេនីយ៍ ហ៊ឹម យ៉ាន បានមានប្រសាសន៍ ជំរុញគ្រប់ស្នងការរាជធានី-ខេត្តទាំងអស់ ត្រូវបន្តចុះអប់រំប្រជាពលរដ្ឋបន្ថែមទៀត ទាក់ទងនឹងច្បាប់ចរាចរណ៍ ខណៈបញ្ហាចរាចរណ៍នេះ នៅតែជាការព្រួយបារម្ភខ្លាំង ចំពោះរាជរដ្ឋាភិបាលដោយសារតែអត្រាគ្រោះថ្នាក់ស្លាប់បាត់បង់ជីវិតភាគច្រើន គឺមិនគោរពច្បាប់បើកបរ។
ក្រោយពីកិច្ចប្រជុំនោះ អគ្គស្នងការរងនគរបាលជាតិបានលើកឡើងថា៖សព្វថ្ងៃនេះបញ្ហាចរាចរណ៍នៅតែជាករណីមួយ ដែលធ្វើឲ្យរាជរដ្ឋាភិបាលព្រួយបារម្ភខ្លាំងដោយសារតែអត្រាគ្រោះថ្នាក់វាស្ថិតនៅខ្ពស់ដដែល ដោយសារតែការបើកបរមិនបានគោរពច្បាប់ និងមិនអនុគ្រោះគ្នាជាដើម។
យោងតាមរបាយការណ៍ នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានឲ្យដឹងថា៖នៅឆ្នាំ២០១៨ គ្រោះថ្នាក់ចរាចរណ៍កើតឡើង៣,២៦៧ករណី លើ៣,៥៣១លើក ថយចុះ២៦៤លើក ស្មើនឹង៧ភាគរយ បើធៀបនឹងឆ្នាំ២០១៧។
ចំណែកអ្នកស្លាប់មានចំនួន១,៧៦១នាក់ លើ១,៧៨០នាក់ ថយចុះ១៩នាក់ ស្មើនឹង១ភាគរយ ខណៈចំនួនអ្នករងរបួសមានចំនួន៤,៧៧០នាក់ លើ៥,៥៣៩នាក់ ថយចុះ៧៦៩នាក់ ស្មើនឹង១៤ភាគរយ។តាមរយៈតួលេខនេះ ជាមធ្យមក្នុង១ថ្ងៃ មនុស្សប្រហែល៥នាក់ បានស្លាប់និង១៣នាក់ បានរងរបួសដោយគ្រោះថ្នាក់ចរាចរណ៍។
របាយការណ៍ដដែរបានបន្ថែមថា៖ មូលហេតុដែលបង្កឲ្យមានគ្រោះថ្នាក់ គឺមកពីបើកបរល្មើសល្បឿនកំណត់៣៧ភាគរយ,ការមិនគោរពសិទ្ធិ១៩ភាគរយ,ការមិនប្រកាន់ស្តាំ១៣ភាគរយ,ការវ៉ាជែង១១ភាគរយ,ការបត់១០ភាគរយ,ស្រវឹង៥ភាគរយ,កត្តាយានយន្ត៣,៥ភាគរយ និងងងុយដេក២ភាគរយ៕