នៅក្នុងស្ថានភាពតានតឹង រវាងមហាអំណាច សហរដ្ឋអាមេរិក និង ប្រទេសអ៉ីរ៉ង់ កាន់តែធ្ងន់ធ្ងរៗទៅក្រុមហ៊ុនអាកាសចរណ៍ធំៗមួយចំនួននៅលើពិភពលោក បានផ្អាកការហោះហើរ នៅសមុទ្រអកមូ!!
ដោយ: កញ្ញា យាត ឆារីន
ចេញផ្សាយថ្ងៃ អាទិត្យ ៥រោច ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី ២២ ខែ មិថុនាឆ្នាំ ២០១៩
ព័ត៌មានអន្តរជាតិ
រដ្ឋធានីបាដាដ:
ស្ថានការណ៍នៅ តំបន់មជ្ឈឹមបូព៌ា កាន់តែ មានភាពអាក្រក់ទៅៗ នៅពេលដែល ប្រទេសសម្ព័ន្ធមិត្តរបស់សហរដ្ឋអាមេរិក គឺប្រទេសអ៉ីស្រាអែល កំពុងតែរៀបចំត្រៀមវាយប្រហារ ទៅប្រទេសអ៉ីរ៉ង់ដែលគេដឹងថា ប្រទេសទាំងពីរនេះ ជាគូរ សត្រូវនឹងគ្នា ជាយូរយារ មកហើយ។ នៅ ថ្ងៃសុក្រទី ២១ មិថុនា ឆ្នាុំ ២០១៩កាលពី ម្សិលមិញមាន ក្រុមហ៊ុនអាកាសចរណ៍ ធំៗមួយ ចំនួនក្នុងពិភពលោក ដែលក្នុងនោះរួមមានក្រុមហ៊ុនរបស់អង់គ្លេស អូស្ត្រាលី បូករួមទាំង របស់ប្រទេស សិង្ហបុរីផង បានផ្អាកជើងហោះហើរជុំវិញ ច្រកសមុទ្រអកមូ។ ការផ្អាកជើងហោះ ហើរនេះ បានធ្វើឡើងខណៈពេលដែលភាពតានតឹងរវាង អ៊ីរ៉ង់ និង អាមេរិកបានផ្ទុះឡើង ខ្លាំងក្លា ដោយសារតែ រឿងអ៊ីរ៉ង់ បានបាញ់យន្តហោះទម្លាក់ ដ្រូនយកការណ៍ របស់ សហរដ្ឌអាមេរិក កាលពីព្រឹកថ្ងៃ ព្រហស្បតិ៍ ទី២០ មិថុនាឆ្នាំ២០១៩កន្លងមក។
ការផ្អាកជើងហោះហើរនេះ ធ្វើឡើងបន្ទាប់ពី ទីភ្នាក់ងារអាកាសចរណ៍ស៊ីវិលអាមេរិក (FAA) ចេញនូវសេចក្តីជូនដំណឹង អំពីគ្រោះថ្នាក់ ដែលអាចកើតមានឡើង និងបានហាមឃាត់ យន្តហោះនានា មិនឲ្យហោះហើរនៅ ជុំវិញ ឬក្បែរ តំបន់ឈូង សមុទ្រពែក្ស និង ឈូង សមុទ្រអូម៉ង់។ តាមពិតទៅ សេចក្តីជូនដំណឹងរបស់ ភ្នាក់ងារអាកាសចរណ៍ស៊ីវិលសហរដ្ឌអាមេរិក ធ្វើឡើង ចំពោះតែ ក្រុមហ៊ុនអាកាសចរណ៍ណា ដែលបាន ចុះបញ្ជីនៅ សហរដ្ឋអាមេរិកប៉ុណ្ណោះ។ តែទោះជាយ៉ាងនេះក្តី ដើម្បីសុវត្ថិភាព របស់ អ្នកដំណើរ ក្រុមហ៊ុនអាកាសចរណ៍ របស់ អឺរ៉ុប និង អាស៊ី ក៏ មិន ហ៊ានប្រថុយគ្រោះថ្នាក់ ហោះហើរ ទៅក្បែរតំបន់ ហាមឃាត់នេះដែរ។
ជាក់ស្តែង នៅថ្ងៃសុក្រកន្លងមកនេះ ក្រោយបានឮអំពី សេចក្តីជូនដំណឹងរបស់សហរដ្ឌអាមេរិកភ្លាម ក្រុមហ៊ុន អាកាសចរណ៍ធំៗ មួយចំនួន បានប្រកាសផ្អាក ជើងហោះហើរ របស់ខ្លួន។ ក្រុមហ៊ុនទាំងនោះ ជាអាទិ៍រួមមាន ក្រុមហ៊ុនអាកាសចរណ៍អង់គ្លេស British Airways, អូស្ត្រាលី Qantas និងក្រុមហ៊ុនសិង្ហបុរី Singapore Airlines។ ការផ្អាកជើងហោះហើររបស់ក្រុមហ៊ុនអាកាសចរណ៍ទាំងនេះ អាចប៉ះពាល់ ដល់អ្នកដំណើរ ចំនួនរាប់ពាន់នាក់។
ទាក់ទងរឿងនេះដែរ តំណាងក្រុមហ៊ុនអាកាសចរណ៍អង់គ្លេស British Airways បាននិយាយថា ក្រុមការងារ របស់ខ្លួន តែងតែទាក់ទង ជាប្រចាំ ជាមួយ នឹង មន្ត្រីពាក់ព័ន្ធ បូករួមទាំង ភ្នាក់ងារអាកាសចរណ៍ស៊ីវិល សហរដ្ឌអាមេរិកផង ដើម្បីធានាឲ្យបាន នូវសុវត្ថភាពពេល ហោះហើរគ្រប់ផ្លូវ គ្រប់ដែនអាកាស។
ជាមួយគ្នានេះ ក្រុមហ៊ុនអាកាសចរណ៍ Qantas របស់ប្រទេសអូស្រ្តាលី បានលើកឡើងពីការផ្អាកជើងហោះហើរ ឆ្លងកាត់ តំបន់គ្រោះថ្នាក់ខាងលើ ហើយថា នឹងដំណើរការជើងហោះហើរ ឡើងវិញលុះត្រាណា មាន សេចក្តីជូនដំណឹងថ្មី។ ចំណែកឯ ក្រុមហ៊ុន អាកាសចរណ៍ សិង្ហបុរី វិញ បានប្រកាសប្រាប់ដល់អ្នកដំណើរថា ពេលវេលាហោះហើររបស់ខ្លួន ទៅកាន់អឺរ៉ុប ទំនងជា ត្រូវប្រើពេលយូរជាងមុន។
ដោយឡែក ទោះបីជា ក្រុមហ៊ុន ជាច្រើន នៅថ្ងៃសុក្រនេះ បានបង្វែរ ផ្លូវហោះហើរ ហើយក្រុមហ៊ុនខ្លះទៀតបានផ្អាកការហោះហើរ នៅជុំវិញសមុទ្រអកមូ យ៉ាងណាក្តី ក៏ក្រុមហ៊ុនអាកាសចរណ៍របស់ប្រទេសអាល្លឺម៉ង់ Lufthansa និង ក្រុមហ៊ុនអាកាសចរណ៍របស់ហូឡង់ KLM បានសម្រេចចិត្ត នៅបន្តធ្វើដំណើរឆ្លងកាត់ តំបន់នេះដដែល៕