ខេត្តកែប៖នៅព្រឹកថ្ងៃទី០៧ ខែសីហា ឆ្នាំ២០១៩ វិទ្យាស្ថានបណ្តុះបណ្តាលពាណិជ្ជកម្ម និង ស្រាវជ្រាវ នៃក្រសួងពាណិជ្ជកម្ម សហការជាមួយ មន្ទីរពាណិជ្ជកម្មខេត្តកែប បានរៀបចំវគ្គបណ្តុះបណ្តាល ស្តីពី ការប្រើប្រាស់ច្បាប់កម្មសិទ្ធិបញ្ញា ដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងខេត្តកែប ក្រោមអធិបតីភាព លោក ព្រុំ គន្ធិ អភិបាលរងខេត្ត តំណាងដ៏ខ្ពង់ខ្ពស់ លោក កែន សត្ថា អភិបាល នៃគណៈអភិបាលខេត្តកែប លោក សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធានវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ និងមានការអញ្ជើញចូលរួមពី លោក លោកស្រី មន្រ្តីរាជការ សិប្បករ សិស្សសាលា ដុនបូស្កូ សរុបជាង៦០នាក់។
លោក ព្រុំ គន្ធិ អភិបាលរងខេត្ត មានប្រសាសន៍ថា ដោយមានការយកចិត្តទុកដាក់ពីរាជរដ្ឋាភិបាលកម្ពុជាក៏ដូចជាថ្នាក់ដឹកនាំខេត្តកែប បានខិតខំស្ថាបនាកសាងផ្លូវជាច្រើនខ្សែដើម្បីទាក់ទាញភ្ញៀវទេសចរ និងវិនិយោគិន ដើម្បីមកវិនិយោគក្នុងខេត្តកែប ក្នុងនោះក៏មានក្រុមហ៊ុន អានកូ ដែលផ្តោតទៅលើទឹក ភ្លើង និងផ្លូវថ្នល់។
លោកបានបន្តថា វគ្គបណ្តុះបណ្តាលនៅព្រឹកនេះមានសារៈសំខាន់ណាស់សម្រាប់សិក្ខាកាមដែលមកទទួលយកការអភិវឌ្ឍន៍ចំណេះដឹងក្នុងនាមជាមន្រ្តីរាជការ ដើម្បីគ្រប់គ្រង និង អាចចូលរួមចំណែកកសាង និងអភិវឌ្ឍសេដ្ឋកិច្ច ពាណិជ្ជកម្មរបស់ប្រទេសកម្ពុជាឲ្យមានកំណើនបន្តទៅមុខទៀត។
កំណើនសេដ្ឋកិច្ចរបស់កម្ពុជា គឺរួមចំណែកយ៉ាងសំខាន់ពីសហគ្រាសធុនតូច និងមធ្យម ដែលតម្រូវឲ្យក្រសួងពាណិជ្ជកម្ម និងភាគីពាក់ព័ន្ធ យកចិត្តទុកដាក់ក្នុងការកសាងសមត្ថភាព ចំណេះដឹង ជូនសហគ្រាសធុនតូច និងមធ្យម បន្ថែមទៀត។
ក្នុងឱកាសនោះ លោក សួន វិជ្ជា ទីប្រឹក្សាក្រសួងពាណិជ្ជកម្ម និងជាប្រធានវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវគូសសបញ្ជាក់ថា វគ្គបណ្តុះបណ្តាលរយៈមួយព្រឹកនេះនឹងផ្តល់នូវចំណេះដឹងចាំបាច់មួយចំនួនដល់សិក្ខាកាមទាំងអស់ ដូចជា ការយល់ដឹងអំពីច្បាប់កម្មសិទ្ធិបញ្ញាលើការគ្រប់គ្រងសហគ្រិនភាព សហគ្រាសធុនតូច និង មធ្យម ការយល់ដឹងពីច្បាប់ស្តីពីសហគ្រាសពាណិជ្ជកម្ម នីតិវិធីនៃការចុះបញ្ជីពាណិជ្ជកម្ម ពាណិជ្ជសញ្ញា និងនីតិវិធីពន្ធដារជាដើម។
ទន្ទឹមនឹងនោះដែរ លោក សួន វិជ្ជា បានជម្រាបជូន សិក្ខាកាមទាំងអស់ អំពីកិច្ចខិតខំ ប្រឹងប្រែងរបស់ក្រសួងពាណិជ្ជកម្មកន្លង ដើម្បីជំរុញកំណើនសេដ្ឋកិច្ច ពាណិជ្ជកម្ម និងទាក់ទាញការវិនិយោគពីបរទេសចូលមកក្នុងព្រះរាជាណាចក្រកម្ពុជា ដូចជា បានខិតខំសម្រួលពាណិជ្ជកម្មដោយលុបបំបាត់នូវការិយាល័យធិបតេយ្យ កាត់បន្ថយនូវបែបបទនាំចេញនាំចូល និងលើកទឹកចិត្តសហគ្រាសធុនតូច និងមធ្យម ធ្វើការនាំចេញ ដោយបានកសាងច្បាប់ និងបទប្បញ្ញាត្តិនានា ដើម្បីធានាឱ្យបាននូវការប្រកួតប្រជែង និងលក្ខខណ្ឌទីផ្សារមួយ ដែលប្រកបដោយសេរី និងយុត្តិធម៌។
ជាមួយគ្នានេះដែរ លោក សួន វិជ្ជា ក៏បានលើកទឹកចិត្តឲ្យសិក្ខាកាមទាំងអស់ខិតខំប្រឹងប្រែងសិក្សារៀនសូត្រទទួលយកចំណេះដឹង និងបទពិសោធន៍ ដែលវាគ្មិនរបស់ក្រសួងពាណិជ្ជកម្ម ចែករំលែកជូននៅក្នុងវគ្គបណ្តុះបណ្តាលនេះ៕