ខេត្តកំពត៖អ្នកភូមិមានការភ្ញាក់ផ្អើល ខណៈឃើញស្ត្រីវ័យកណ្តាលម្នាក់ ត្រូវគេវាយនឹងពូថៅស្លាប់ក្នុងផ្ទះរបស់ខ្លួន ដោយភាពចលាចលនេះបានកើតឡើងនៅព្រឹកថ្ងៃទី០២ ខែតុលា ឆ្នាំ២០១៩ ស្ថិតក្នុងលំនៅដ្ឋានស្ត្រីរងគ្រោះ ឈ្មោះ សៅ ខេន ភេទស្រី អាយុ៥០ឆ្នាំ ក្នុងភូមិត្រពាំងក្តារ ឃុំស្រែជាខាងកើត ស្រុកដងទង់ ខេត្តកំពត។
យោងតាមប្រភពពីសមត្ថកិច្ចមូលដ្ឋាន បានឲ្យដឹងថា អំពើមនុស្សឃាតនេះ អាចផ្តើមឡើងដោយអំពើប្លន់យកទ្រព្យសម្បតិ្ត ព្រោះស្ត្រីរងគ្រោះរស់នៅក្នុងផ្ទះកើតហេតុតែម្នាក់ឯង ហើយករណីប្លន់នេះអាចកើតឡើងនៅយប់ពាក់កណ្តាលអធ្រាត ឬឆ្លងអធ្រាត ថ្ងៃទី០២ ខែតុលា ឆ្នាំ២០១៩។
សមត្ថកិច្ចបានបញ្ជាក់ទៀតថា ការអះអាងបែបនេះ ខណៈនៅក្នុងផ្ទះកើតហេតុមានបន្សល់នូវវត្ថុតាង ដូចជាពូថៅ១ កាំបិតផ្គាក់១ ព្រមទាំងសម្ភារៈសម្រាប់បង្កបទល្មើសមួយចំនួន ហើយក្នុងវេលានោះស្ត្រីរងគ្រោះបានបាត់បង់មាសទម្ងន់៣ជី ៥ហ៊ុន និងថវិកាចំនួន៥ម៉ឺនរៀលផងដែរ ទើបសមត្ថកិច្ចដាក់បន្ទុកថា ជាករណីសម្លាប់យកទ្រព្យសម្បតិ្ត។
ក្រោយពីមានករណីវាយសម្លាប់ស្ត្រីម្នាក់ខាងលើ សមត្ថកិច្ចជំនាញ នៃស្នងការដ្ឋាននគរបាលខេត្តកំពត បានចុះត្រួតពិនិត្យធ្វើកោសល្យវិច័យ ដើម្បីរកតម្រុយការពិត និងស៊ើបអង្កេត ក្នុងការស្វែងរកជនដៃដល់នៃអំពើប្លន់យកទ្រព្យសម្បតិ្តនេះ ដើម្បីផ្តន្ទាទោសទៅតាមច្បាប់។
បច្ចុប្បន្នសពស្ត្រីរងគ្រោះ ត្រូវបានសាច់ញាតិកំពុងរៀបចំចាត់ចែងធ្វើបុណ្យតាមប្រពៃណី នៅក្នុងលំនៅដ្ឋាន៕