រាជធានីភ្នំពេញ៖ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឈានជិតមកដល់ហើយនោះ កាលពីព្រឹកថ្ងៃសុក្រ ១២កើត ខែកត្ដិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៨ ខែវិច្ឆិកា ឆ្នាំ២០១៩នេះ រដ្ឋបាលរាជធានីភ្នំពេញ បានរៀបចំពិធីបួងសួងសុំសេចក្តីសុខនិងសំណេះសំណាលជាមួយកីឡាករចំណុះទូកផងដែរ។
ពិធីនេះមានការចូលរួមពីសំណាក់លោក លោកស្រីគណៈអភិបាល លោក លោកស្រី ប្រធាន សមាជិក សមាជិកា ក្រុមប្រឹក្សារាជធានីភ្នំពេញ លោក លោកស្រីមន្ទីរអង្គភាពជំនាញ រដ្ឋបាលខណ្ឌទាំង១៤ និងបងប្អូនកីឡាករ កីឡាការិនី ចំណុះទូកយ៉ាងច្រើនកុះករផងដែរ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ស្ថិតនៅសង្កាត់វត្តភ្នំ ខណ្ឌដូនពេញ រាជធានីភ្នំពេញ។
ក្នុងឱកាសនោះដែរ លោក ឃួង ស្រេង អភិបាលរាជធានីភ្នំពេញផ្តាំផ្ញើឲ្យចំណុះទូក ដែលត្រូវចូលរួមប្រណាំងនៅថ្ងៃបុណ្យអុំទូក កុំស្តាប់តាមការញុះញង់ របស់ក្រុមឧទ្ទាមក្រៅច្បាប់ បើមិនចង់មានទោស ហើយត្រូវតាំងចិត្តជាអ្នកកីឡាករ ចាញ់ឈ្នះតាមលក្ខណៈ បច្ចេកទេសត្រូវអនុវត្តតាមបទបញ្ជារបស់គណៈកម្មាការបុណ្យជាតិ។បន្ថែមលើនេះលោកអភិបាលសំណូមពរឲ្យកីឡាករដែលមកពី២៤ខេត្តក្រុងធ្វើយ៉ាងណាកុំសប្បាយភ្លេចខ្លួននាំទុក្ខដល់ក្រុមគ្រួសារ៕