សហរដ្ឋអាមេរិក-អាល្លឺម៉ង់ បង្ហាញប្រសិទ្ធភាពជាង ៩០% ចំពោះវ៉ាក់សាំង Covid 19 សហភាពអឺរ៉ុប(EU) បានសម្រេចទិញចំនួន ៣០០លានដូស !!!!!
ដោយ : លោក ភៀង សុភា
ដកស្រង់ចេញពី សារព័ត៌មាន CNA
ចេញផ្សាយថ្ងៃ ពុធ ១១រោច ខែកត្តិក ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី ១១ ខែវិច្ឆិកា ឆ្នាំ ២០២០
ព័ត៌មានអន្តរជាតិ
រដ្ឋធានីព្រុចស៊ែល៖
ប្រធានគណៈកម្មការអឺរ៉ុបលោកស្រី យូស៊ូឡា វ៉ុន ដឺ ឡេយែន (Ursula von der Leyen) នៅថ្ងៃអង្គារសប្តាហ៍នេះបានប្រកាសឱ្យដឹងថា សហភាពអឺរ៉ុប (EU) នឹងផ្តល់កិច្ចសន្យាសម្រាប់ការទិញវ៉ាក់សាំង COVID-19 ចំនួន ៣០០លានដូស ដែលអភិវឌ្ឍដោយក្រុមហ៊ុន បាយអូអិនធិច (BioNTech) របស់ប្រទេសអាល្លឺម៉ង់ និងក្រុមហ៊ុនដៃគូ ភីហ្វីហ្សឺ (Pfizer) របស់សហរដ្ឋអាមេរិក។ នេះបើតាមការចេញផ្សាយ ដោយសារព័ត៌មាន CNA នារសៀលថ្ងៃពុធ ទី១១ ខែវិច្ឆិកា ឆ្នាំ២០២០។
លោកស្រី បានបង្ហោះសារនៅលើបណ្តាញសង្គម Twitter យ៉ាងដូច្នេះថា នេះគឺជាបេក្ខភាពវ៉ាក់សាំងដ៏ជោគជ័យបំផុត ហើយកិច្ចសន្យាដែលធ្វើឡើងនៅថ្ងៃពុធនេះ នឹងក្លាយជាកិច្ចព្រមព្រៀងទី ៤ រវាងសហភាពអឺរ៉ុប ជាមួយក្រុមហ៊ុនឱសថនានា ដើម្បីទិញវ៉ាក់សាំងប្រឆាំងនឹងជំងឺ COVID-19។ កិច្ចសន្យានេះត្រូវបានធ្វើឡើងបន្ទាប់ពីក្រុមហ៊ុនទាំងពីរ បានប្រកាសកាលពីថ្ងៃចន្ទដើមសប្តាហ៍នេះថា បេក្ខភាពវ៉ាក់សាំងរបស់ពួកគេ បានបង្ហាញពីប្រសិទ្ធភាពជាង ៩០% ប្រឆាំងនឹងជំងឺ COVID-19 ចំពោះអ្នកចូលរួមធ្វើតេស្ត ដែលគ្មានប្រវត្តិឆ្លងវីរុសកូរ៉ូណាពីមុន។
គួរជម្រាបថា ស្របពេលដែលពិភពលោកកំពុងប្រយុទ្ធប្រឆាំងនឹងជំងឺ COVID-19 ប្រទេសជាច្រើនរួមមាន អាល្លឺម៉ង់ ចិន រុស្ស៊ី ចក្រភពអង់គ្លេស និងសហរដ្ឋអាមេរិកកំពុងប្រជែងគ្នា ដើម្បីស្វែងរកវ៉ាក់សាំងដ៏មានប្រសិទ្ធភាព។ បើតាមគេហទំព័ររបស់អង្គការសុខភាពពិភពលោក (WHO) គិតត្រឹមថ្ងៃទី ៣ ខែវិច្ឆិកា មានបេក្ខភាពវ៉ាក់សាំង COVID-19 សរុបចំនួន ២០២ ដែលកំពុងត្រូវបានអភិវឌ្ឍឡើងនៅទូទាំងពិភពលោក ក្នុងនោះបេក្ខភាពវ៉ាក់សាំងចំនួន ៤៧ កំពុងស្ថិតក្រោមការធ្វើតេស្តសាកល្បង៕
ដោយះ គេហទំព័រ សម្លេងជាយដែន
https://www.cdv-news.com/