ប្រជាពលរដ្ឋ១៦គ្រួសារដែលរស់នៅលិចទឹក រីករាយដែលអាជ្ញាធរបានផ្តល់លំនៅដ្ឋានថ្មីដល់ពួកគាត់!!!
ដោយ : លោក ភួង មុនីរដ្ឋ
ចេញផ្សាយថ្ងៃ ព្រហស្បតិ៍ ១២រោច ខែកត្តិក ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី ១២ ខែវិច្ឆិកា ឆ្នាំ ២០២០
ព័ត៌មានជាតិ
រាជធានីភ្នំពេញ៖ (ខណ្ឌពោធិ៍សែនជ័យ)
នៅព្រឹកថ្ងៃទី១២ ខែវិច្ឆកា ឆ្នាំ២០២០ ដោយមានការចង្អុលបង្ហាញពីឯកឧត្តម ឃួង ស្រេង អភិបាលរាជធានីភ្នំពេញ និងលោក ហែម ដារិទ្ធ អភិបាលនៃគណៈអភិបាលខណ្ឌពោធិ៍សែនជ័យ ទើបនៅព្រឹកថ្ងៃទី១២នេះអាជ្ញាធរសង្កាត់ចោមចៅទី៣ ដឹកនាំដោយលោក វ៉ា សាវឿន ចៅសង្កាត់ចោមចៅទី៣ បានដឹកនាំក្រុមការងារចុះពិភាក្សាដោយផ្ទាល់ជាមួយប្រជាពលរដ្ឋចំនួន១៦គ្រួសារ ដែលសង់ផ្ទះរស់នៅលើប្រឡាយមេមួយខ្សែ ស្ថិតនៅខាងក្រោយសាលាបឋមសិក្សាជម្ពូវ័ន ក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ក្នុងកិច្ចពិភាក្សាខាងលើនេះប្រជាពលរដ្ឋទាំង១៦គ្រួសារមានការរីករាយយ៉ាងក្រៃលែងដែលអាជ្ញាធរបានយកចិត្តទុកដាក់ ដឹងពីទុក្ខលំបាករបស់ពួកគាត់ ។ការដោះដូរលំនៅដ្ឋានមកខាងលើ ដោយសារកន្លែងដែលប្រជាពលរដ្ឋរស់នៅសព្វថ្ងៃគឺជាប្រឡាយមេដែលត្រូវរំដោះទឹកការពារការជន់លិចក្នុងមូលដ្ឋាន និងត្រូវបើកប្រឡាយខាងលើឡើងវិញ ដូច្នេះដោយអាជ្ញាធរមើលឃើញនៅការខ្វះខាតរបស់ប្រជាពលរដ្ឋ ទើបសម្រេចចិត្តស្នើសុំទីតាំងថ្មីដែលនៅជាប់ក្បែរនោះឲ្យប្រជាពលរដ្ឋរស់នៅជាថ្នូរនឹងការសុំបើកប្រឡាយមេមួយខ្សែនោះឡើងវិញ។ដូច្នេះអាជ្ញាធរសំណូមពរស្នើសុំឲ្យប្រជាពលរដ្ឋមេត្តាជួយសហការទាំងអស់គ្នាដើម្បីពន្លឿនក្នុងការប្តូរទៅរស់នៅទីតាំងថ្មីវិញ៕
ដោយះ គេហទំព័រ សម្លេងជាយដែន
https://www.cdv-news.com/