លោក ឡាយ ធុល ច្រានចោលទាំងស្រុង និងបដិសេធចំពោះការចុះផ្សាយរបស់ ទូរទស្សន៍អនឡាញ ធីអឹនអឹម ដោយចោទប្រកាន់ថា ការដាក់ពាក្យបណ្ដឹងរបស់លោកនេះ គឺជាការគំរាមកំហែងកូនក្មេងនោះ!!!
ដោយះ លោក ភួង មុនីរដ្ឋ
ចេញផ្សាយថ្ងៃ សុក្រ ៤រោច ខែមិគសិរ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី០៤ខែធ្នូ ឆ្នាំ ២០២០
ព័ត៌មានអន្តរជាតិ
ខេត្តក្រចេះ:
បើតាមការបញ្ជាក់ របស់លោក ឡាយ ធុល បានឲ្យក្រុមការងារគេហទំព័រ យើងដឹងនៅរសៀលថ្ងៃទី០៣ ខែធ្នូ ឆ្នាំ២០២០នេះថា ជុំវិញបញ្ហាដែលលោកសម្រេចដាក់ពាក្យបណ្ដឹង មួយច្បាប់ទៅកាន់តុលាការសាលាដំបូងខេត្តមណ្ឌលគិរី ទៅលើបុគ្គលដែលឈ្មោះ ធុន សារ៉ូត អាយុ២១ឆ្នាំ មានតួនាទីជាមន្ត្រីសាលាក្រុងសែនមនោរម្យ ទីលំនៅបច្ចុប្បន្ន ស្ថិតនៅភូមិពូលូង សង្កាត់រមនា ក្រុងសែនមនោរម្យ ខេត្តមណ្ឌលគិរី កាលពីថ្ងៃទី២៣ ខែវិច្ឆិកា ឆ្នាំ២០២០ កន្លងទៅនេះ ចំពោះមូលហេតុ ដែលឈ្មោះធុន សារ៉ូត បានបង្ហោះនៅលើបណ្ដាញសង្គមហ្វេសប៊ុករបស់ខ្លួន ឈ្មោះ X Rod Tobtect ដោយសរសេរ យ៉ាងខ្លី និងបង្កប់អត្ថន័យយ៉ាងស៊ីជម្រៅពាក់ព័ន្ធនឹងអំពើពុករលួយ ក្នុងខ្លឹមសារនោះ បានសរសេរចោទប្រកាន់ លោកដោយពុំមានយោងពីប្រភពនោះទេ។ខ្លឹមសារនោះសរសេរថា តាមពិតលោក Thol kt ពិតជាបានទទួលផលប្រយោជន៍ក្នុងរឿងនេះដែរ អញ្ចឹងតើទើបបានជាមិនជួយសម្របសម្រួលបែរជាជួយបំបែកបំបាក់បន្ថែមចាំមើលរឿងនេះចុងក្រោយនឹងទៅជាយ៉ាងណា។
ដោយឃើញការសរសេរចោទប្រកាន់ យ៉ាងធ្ងន់ធ្ងរបំផុតបែបនេះ អាចធ្វើឲ្យប៉ះពាល់ដល់កិត្តិយសកេរ្តិ៍ឈ្មោះដ៏ស្អាតស្អំ ទើបលោក ឡាយ ធុល ក៏បានចេញជាលិខិតផ្លូវការចំនួនមួយច្បាប់ ដើម្បីស្នើសុំ ឲ្យលោក ធុន សារ៉ូត មេត្តាធ្វើការបកស្រាយ ជាសាធារណៈកាលពីថ្ងៃទី២២ ខែវិច្ឆិកា ឆ្នាំ២០២០ និងសុំឲ្យបញ្ជាក់ លើបញ្ហានៃការចោទប្រកាន់ទាំងនេះ ដោយមានខ្លឹមសារថា:
ទី១.តើផលប្រយោជន៍ ដែលលោកទទួលនោះគឺជាអ្វីខ្លះ?
ទី២. មានចំនួនប៉ុន្មាននោះដែរ? ហើយមានអ្វីខ្លះ?
ទី៣.ហើយនៅកន្លែងណា? និងនៅវេលាម៉ោងប៉ុន្មាន? ក្នុងការស្នើសុំបកស្រាយនេះ ឱ្យមានឯកសារជាក់លាក់ផង ប៉ុន្តែបើពុំមានឯកសារបញ្ជាក់នោះទេ គឺសំុត្រឹមតែសុំទោសលោកជាសាធារណៈទៅបានហើយ ប៉ុន្តែផ្ទុយទៅវិញលោក ធុន សារ៉ូតរូបនេះ ពុំបានធ្វើការបកស្រាយនោះទេ បែរជាសំអាងទៅលើលិខិតបដិសេធទៅវិញ ដោយពុំមានការបកស្រាយ ពីលោក ធុន សារ៉ូត ជូន លោក ឡាយ ធុល ដើម្បីធ្វើការផ្សព្វផ្សាយបន្ត និងកែតម្រូវឡើងវិញនោះ ទើបលោក ឡាយ ធុល សម្រេចដាក់ពាក្យបណ្ដឹងជាផ្លូវការណ៍ នៅថ្ងៃទី២៣ ខែវិច្ឆិកា ឆ្នាំ២០២០ វេលាម៉ោង ០៨និង៣០ នាទីព្រឹកនោះតែម្ដង។លោក ឡាយ ធុល ក៏បានបញ្ជាក់បន្ថែមថា ក្រោយពីលោកបានដាក់ពាក្យបណ្ដឹងបានប៉ុន្មានថ្ងៃ គេសង្ស័យថា ប្រហែលជាលោក ធុន សារ៉ូត មានការតក់ស្លុតភ័យស្លន់ស្លោដេកពុំលក់ បក់ក៏មិនល្ហើយ ឬស៊ីមិនឆ្ងាញ់ទេមើលទៅនោះ ទើបរត់រកគេឯងឲ្យជួយ អន្តរាគមន៍បែបនេះ?
តែទោះជាយ៉ាងណា លោក ឡាយ ធុល ក៏បានអរគុណនូវសន្តាននៃទឹកចិត្ត របស់លោក សែម បូរ៉ា អគ្គនាយកទូរទស្សន៍ អនឡាញ ធីអិនអឹម និង លោក ចន្ថា ដែលជាពិធីករទូរទស្សន៍ ឡនឡាញ ធីអឹនអឹម បានទំនាក់ទំនងមកលោក ឡាយ ធុលផ្ទាល់ ដោយក្នុងគោលបំណងជួយសម្របសម្រួលរឿងនេះ កាលពីថ្ងៃទី៣០ ខែវិច្ឆិកា ឆ្នាំ២០២០ នេះក្រៅប្រព័ន្ធតុលាការ ក្នុងការស្នើសុំនេះដែរឱ្យលោក ឡាយ ធុលដកពាក្យបណ្ដឹងទាំងសងខាងដើម្បីបញ្ចប់រឿងនេះ។
ចំណែកឯលោកចន្ថា ដែលជាពិធីករទូរទស្សន៍អនឡាញ ធីអឹនអឹម ក៏បានទំនាក់ទំនងតាមwhatup ស្នើសុំឱ្យលោក ឡាយ ធុលជជែកគ្នានៅក្នុងរឿងនេះ លុះដល់លោក ឡាយ ធុល បានដាក់ឯកសារដែលពាក់ព័ន្ធ និងអត្ថន័យខ្លឹមសារ ក្នុងអត្ថបទដែលលោកបានចុះផ្សាយកាលពីថ្ងៃទី២២ ខែវិច្ឆិកា ឆ្នាំ២០២០នោះ និងឯកសារពាក់ព័ន្ធផ្សេងៗមួយចំនួនទៀត ដើម្បីបញ្ជាក់ និងជាការបកស្រាយ តែលោក ចន្ថា ពុំបានយកខ្លឹមសារទាំងនេះ ទៅធ្វើការចុះផ្សាយតាមវិជ្ជាជីវៈនោះឡើយ មិនត្រឹមតែប៉ុណ្ណោះ ទូរទស្សន៍អនឡាញ ធីអឹនអឹម បែរជាចុះផ្សាយថា ការប្ដឹងរបស់លោក ឡាយ ធុលនេះដែរ គឺជាការគំរាមកំហែងទៅលើកូនក្មេងទៅវិញ។ចំពោះបញ្ហានៃការចុះផ្សាយរបស់ទូរទស្សន៍អនឡាញ ធីអឹនអឹម នេះដែរ លោក ឡាយ ធុល នៅតែពុំទាន់បានយល់ថា តើទូរទស្សន៍អនឡាញ ធីអឹនអឹម មានបំណងអ្វីឲ្យប្រាកដនោះទេ។
បញ្ជាក់: ចំពោះការដាក់ពាក្យបណ្ដឹងនេះ គឺលោក ឡាយ ធុល មិនយល់ស្របតាមការការចុះផ្សាយ ឬសម្របសម្រួលក្នុងការដកពាក្យបណ្ដឹងនោះឡើយ លោកថា ដើម្បីភាពយុត្តិធម៌គឺ មានតែ ប្រព័ន្ធផ្លូវច្បាប់របស់តុលាការ តែមួយគត់ ជាអ្នកមានសិទ្ធិសម្រេច នោះ ហើយក៏រឹតតែមិនអាចមានអ្នកសារព័ត៌មានរូបណាម្នាក់ ចេញមុខសម្របសម្រួល ឬក៏សម្រេចជំនួសប្រព័ន្ធតុលាការបាននោះដែរ។នេះបើយោងតាមប្រសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោហ៊ុនសែនដែលជាប្រមុខនៃថ្នាក់ដឹកនាំបានមានប្រសាសន៍ ទៅកាន់អ្នកសារព័ត៌មានទូរទាំងប្រទេស ហើយរឹតតែមិនអាចដើរតួជាអ្នកសារព័ត៌មានផង ជាសមត្ថកិច្ចផង និងជាតុលាការផងបាននោះឡើយ៕
ដោយះ គេហទំព័រ សម្លេងជាយដែន
https://www.cdv-news.com/