ប្រទេស វ៉េណេស៊ុយអេឡា គឺ មេរៀនធំមួយពីប្រទេសសម្បូរធនធាន តែធ្លាក់ចូលក្នុងវិបត្តិយ៉ាងជ្រៅ !!!!!

ប្រទេស វ៉េណេស៊ុយអេឡា គឺ មេរៀនធំមួយពីប្រទេសសម្បូរធនធាន តែធ្លាក់ចូលក្នុងវិបត្តិយ៉ាងជ្រៅ !!!!!

ព័ត៌មានជាតិ
ដោយះ លោក សោ សិលា
ចេញផ្សាយថ្ងៃ ចន្ទ ២ រោច ខែ បុស្ស ឆ្នាំ ម្សាញ់ សប្តស័ក ពុទ្ទសករាជ ២៥៦៩ ត្រូវនឹងថ្ងៃ ទី៥ ខែ មករា ឆ្នាំ ២០២៦

(ពិភពលោក)៖

រឿងរ៉ាវរបស់ វ៉េណេស៊ុយអេឡា ត្រូវបានអ្នកវិភាគជាច្រើនចាត់ទុកថា ជា «ករណីសិក្សាសំខាន់» សម្រាប់ពិភពលោក ក្នុងការស្វែងយល់ថា ហេតុអ្វីបានជាប្រទេសមួយ ដែលមានធនធានធម្មជាតិដ៏សម្បូរសប្បាយ ជាពិសេសធនធានប្រេងឥន្ធនៈ បែរជាធ្លាក់ខ្លួនចូលទៅក្នុងវិបត្តិសេដ្ឋកិច្ច នយោបាយ និងសង្គមយ៉ាងធ្ងន់ធ្ងរ។វ៉េណេស៊ុយអេឡា គឺជាប្រទេសមួយដែលមានប្រេងបម្រុងធំបំផុតនៅលើពិភពលោក។ ជាយូរមកហើយ ប្រេងឥន្ធនៈ បានធ្វើឲ្យប្រទេសនេះមានចំណូលខ្ពស់ និងមានតួនាទីសំខាន់ក្នុងទីផ្សារថាមពលអន្តរជាតិ។ ទោះជាយ៉ាងណា ការពឹងផ្អែកខ្លាំងលើវិស័យប្រេងតែមួយ បានធ្វើឲ្យសេដ្ឋកិច្ចជាតិខ្វះភាពចម្រុះ និងងាយរងគ្រោះ នៅពេលតម្លៃប្រេងនៅលើ ទីផ្សារពិភពលោកធ្លាក់ចុះ។
បន្ថែមពីនេះ ការគ្រប់គ្រងសេដ្ឋកិច្ចមិនមានប្រសិទ្ធភាព ការចូលមកជ្រៀតជ្រែកខ្លាំងពីរដ្ឋលើវិស័យឯកជន ការចំណាយរដ្ឋហួសហេតុ និងបញ្ហាពុករលួយ បានធ្វើឲ្យប្រព័ន្ធសេដ្ឋកិច្ចរបស់ប្រទេសនេះ ចុះខ្សោយបន្តិចម្តងៗ។ នៅពេលចំណូលពីប្រេងធ្លាក់ចុះ រដ្ឋាភិបាលមិនមានធនធានគ្រប់គ្រាន់ ដើម្បីគាំទ្រប្រជាជន និងសេដ្ឋកិច្ចជាតិទៀតឡើយ។

វិបត្តិនេះកាន់តែធ្ងន់ធ្ងរ ពេលដែលបញ្ហានយោបាយក្នុងស្រុកកើនឡើង ការបែងចែកអំណាចមិនច្បាស់លាស់ និងភាពតានតឹងជាមួយប្រទេសខាងក្រៅ បាននាំឲ្យមានការដាក់ទណ្ឌកម្មសេដ្ឋកិច្ចអន្តរជាតិ។ វាបានប៉ះពាល់យ៉ាងខ្លាំង ដល់ការនាំចេញប្រេង ការទទួលបានប្រាក់រូបិយវត្ថុបរទេស និងសមត្ថភាពនាំចូលទំនិញចាំបាច់របស់ប្រទេស។លទ្ធផលចុងក្រោយ គឺប្រជាជនវ៉េណេស៊ុយអេឡា ត្រូវប្រឈមមុខនឹងអត្រាអតិផរណាខ្ពស់ខ្លាំង កង្វះអាហារ ឱសថ និងសេវាសាធារណៈមូលដ្ឋាន ខណៈប្រជាជនរាប់លាននាក់ត្រូវចាកចេញពីប្រទេស ដើម្បីស្វែងរកជីវភាពល្អប្រសើរនៅក្រៅប្រទេស។ ជាប្រទេសមួយពឹងផ្អែកតែលើប្រេងពេក ពោលគឺជាង ៩៥% នៃចំណូលជាតិបានមកពីការលក់ប្រេង។ តែពេលដែលតម្លៃប្រេងពិភពលោកធ្លាក់ចុះប៉ុន្មានឆ្នាំមកនេះ សេដ្ឋកិច្ចប្រទេសនេះគាំងតែម្ដង ព្រោះមិនបានផលិតអ្វីផ្សេងលក់ ស្របពេលអំពើពុករលួយរីកដូចផ្សិត។
ប្រវត្តិលោក Hugo Chávez ឡើងកាន់អំណាច
និយាយពីប្រវត្តិ Hugo Chávez គឺជាអតីតមន្ត្រីយោធា ដែលលេចធ្លោឡើងបន្ទាប់ពីការប៉ុនប៉ងធ្វើរដ្ឋប្រហារឆ្នាំ ១៩៩២។ ទោះបីបរាជ័យក៏ដោយ ការលេចមុខរបស់លោកបានធ្វើឲ្យប្រជាជនជាច្រើន មើលឃើញថា លោកជាតំណាង នៃការប្រឆាំងប្រព័ន្ធនយោបាយចាស់ និងអំពើពុករលួយ។ នៅឆ្នាំ ១៩៩៨ លោកត្រូវបានជ្រើសតាំងជាប្រធានាធិបតី ដោយសន្យានាំមកនូវ «បដិវត្តបូលីវ៉ា» (Bolivarian Revolution) ដើម្បីការពារជនក្រីក្រ និងបែងចែកធនធានជាតិឡើងវិញ។
ក្នុងអំឡុងពេលដឹកនាំ (១៩៩៩–២០១៣) Chávez បានប្រើប្រាស់ចំណូលពីប្រេង ដើម្បីអនុវត្តន៍គោលនយោបាយសង្គម យ៉ាងទូលំទូលាយ ដូចជា សុខាភិបាល អប់រំ និងជំនួយសង្គម។ គោលនយោបាយទាំងនេះធ្វើឲ្យលោក ទទួលបាន ការគាំទ្រខ្លាំងពីប្រជាជនក្រីក្រ។ ទោះជាយ៉ាងណា ការជ្រៀតជ្រែកយ៉ាងខ្លាំងរបស់រដ្ឋលើវិស័យឯកជន ជាតូបនីយកម្មក្រុមហ៊ុន និងការពឹងផ្អែកខ្លាំងលើប្រេង បានបង្កើតមូលដ្ឋានបញ្ហាសេដ្ឋកិច្ចយ៉ាងធ្ងន់ធ្ងរ សម្រាប់អនាគត។

លោក Nicolás Maduro ពីអ្នកស្នងតំណែង ទៅជាធ្លាក់ក្នុងវិបត្តិជ្រៅ បន្ទាប់ពី Hugo Chávez ទទួលមរណភាពនៅឆ្នាំ ២០១៣ លោក Nicolás Maduro ដែលជាអតីតរដ្ឋមន្ត្រីការបរទេស និងជាអនុប្រធានាធិបតី ត្រូវបានជ្រើសតាំងជាប្រធានាធិបតីថ្មី។ លោក Maduro បានបន្តគោលនយោបាយរបស់លោក Hugo Chávez ប៉ុន្តែបរិបទពេលនោះខុសពីមុនយ៉ាងខ្លាំង ដោយសារតម្លៃប្រេងធ្លាក់ចុះ និងសេដ្ឋកិច្ចជាតិចាប់ផ្តើមរងការដួលរលំ។
ក្រោមការដឹកនាំរបស់ លោក Maduro ប្រទេសបានជួបប្រទះអតិផរណាខ្ពស់បំផុតមួយក្នុងប្រវត្តិសាស្ត្រពិភពលោក កង្វះអាហារ ឱសថ និងសេវាសាធារណៈ។ ភាពតានតឹងនយោបាយក្នុងស្រុក ការជំទាស់ពីបក្សប្រឆាំង និងការមិនទទួលស្គាល់ពីប្រទេសជាច្រើន បាននាំឲ្យវ៉េណេស៊ុយអេឡា រងការដាក់ទណ្ឌកម្មសេដ្ឋកិច្ចអន្តរជាតិ ដែលបង្កើនភាពលំបាកដល់ប្រជាជនសាមញ្ញ។

មេរៀនចេញពីប្រទេសវ៉េណេស៊ុយអេឡា ក្រោមការដឹកនាំរបស់លោក Hugo Chávez និងលោក Nicolás Maduro បង្ហាញថា ការដឹកនាំដែលផ្អែកលើប្រជាប្រិយភាព និងធនធានធម្មជាតិ អាចផ្តល់លទ្ធផលល្អតែក្នុងរយៈពេលខ្លីប៉ុណ្ណោះ ហើយបើខ្វះការគ្រប់គ្រងសេដ្ឋកិច្ច ប្រកបដោយចីរភាព ស្ថាប័នរឹងមាំ និងភាពថ្លៃថ្នូរនៃរដ្ឋាភិបាល វាអាចនាំប្រទេសមួយ ធ្លាក់ចូលក្នុងវិបត្តិយ៉ាងជ្រៅ។

ដោយឡែកពីបរិបទនយោបាយ និងសេដ្ឋកិច្ចជាក់ស្តែង ករណីវ៉េណេស៊ុយអេឡា បានផ្តល់មេរៀនសំខាន់មួយដល់ប្រទេសទាំងឡាយថា គឺ «ធនធានសម្បូរបែប មិនមែនជាការធានាជោគជ័យជារៀងរហូតទេ» ប្រសិនបើគ្មានការគ្រប់គ្រងល្អ ភាពថ្លៃថ្នូរនៃស្ថាប័ន និងយុទ្ធសាស្ត្រអភិវឌ្ឍប្រកបដោយចីរភាព។
ករណីនេះ ដូច្នេះហើយ បានក្លាយជាការព្រមានដ៏ច្បាស់លាស់ សម្រាប់ពិភពលោកទាំងមូល អំពីគ្រោះថ្នាក់នៃការពឹងផ្អែកលើ ធនធានតែមួយ និងការគ្រប់គ្រងដែលខ្វះប្រសិទ្ធភាព ក្នុងពិភពលោកដែលកំពុងផ្លាស់ប្តូរយ៉ាងឆាប់រហ័ស៕

ដោយះ សមាគមសារព័ត៌មាន ឈុន ពេជ្រ ជាយដែន
https://www.cdv-news.com/